نیپال: وزیرِ تعلیم ودیا بھٹرائی کا استعفیٰ—وزیرِ اعظم کے پی اولی کے آمرانہ رویے کے خلاف بغاوت
کٹھمنڈو (خصوصی رپورٹ): نیپال کی سیاسی تاریخ نے ایک غیر معمولی لمحہ اس وقت دیکھا جب وزیرِ تعلیم ودیا بھٹرائی نے اپنے عہدے سے استعفیٰ دے دیا۔ یہ فیصلہ نہ صرف ایک انفرادی احتجاج ہے بلکہ وزیرِ اعظم کے پی شرما اولی کی آمرانہ پالیسیوں کے خلاف ایک جمہوری بغاوت کی حیثیت رکھتا ہے۔
ودیا بھٹرائی، جو برسوں سے حکمراں جماعت کی ایک سرگرم اور بااثر رکن رہی ہیں، نے اپنے استعفیٰ میں وزیرِ اعظم کے نجی تعلیمی اداروں کی حمایت، آئینی وعدوں کی خلاف ورزی اور تعلیم جیسے حساس شعبے کو سیاسی مفادات کی نذر کرنے پر شدید تحفظات کا اظہار کیا۔
ملک بھر میں اساتذہ اپنے حقوق کے لیے سراپا احتجاج ہیں، جبکہ حکومت کی خاموشی پر تنقید میں دن بہ دن اضافہ ہو رہا ہے۔ اس کشیدہ ماحول میں ودیا بھٹرائی نے احتجاجی اساتذہ سے ملاقات کی، تعلیم بل کی منظوری کے لیے جدوجہد کی، لیکن وزیرِ اعظم کی مداخلت نے اُن کی کوششوں کو بارہا ناکام بنایا۔
اپنے استعفے میں بھٹرائی نے کہا:
"اگر کرسی اور ضمیر میں سے کسی ایک کا انتخاب کرنا ہو تو ایک سچا رہنما ہمیشہ ضمیر کی آواز پر لبیک کہتا ہے۔"
سیاسی مبصرین اس استعفیٰ کو وزیرِ اعظم کے پی اولی کی کمزور ہوتی گرفت اور پارٹی کے اندر بڑھتی بےچینی کا اشارہ قرار دے رہے ہیں۔
ماوادی مرکز لمبنی پردیش کے سینئر رہنما مولانا مشہود خان نیپالی نے اس فیصلے کو "عوامی ضمیر کی جیت" قرار دیتے ہوئے کہا:
"جب اقتدار اور اصولوں میں تصادم ہو تو تاریخ ہمیشہ اصولوں کو زندہ رکھتی ہے۔ محترمہ ودیا بھٹرائی کا قدم نیپال کی سیاسی فضا میں ایک تازہ ہوا کا جھونکا ہے۔"
انہوں نے حکومت سے مطالبہ کیا کہ وہ احتجاجی اساتذہ کی بات سنے اور تعلیم جیسے بنیادی شعبے کو سیاسی مفادات سے پاک کرے۔
سیاسی تجزیہ کاروں کا ماننا ہے کہ ودیا بھٹرائی کا یہ تاریخی فیصلہ نہ صرف نیپال میں جمہوری قدروں کے احیاء کی طرف ایک مضبوط قدم ہے، بلکہ یہ مستقبل میں دیگر وزراء اور رہنماؤں کے لیے بھی ایک مثال قائم کرے گا۔
